rang hai ai saqi-e-sarshar qiasar-bagh men
phuul piite hain tire mai-khvar qiasar-bagh men
dekh kar rangin tira rukhsar qaisar-bagh men
gul se bulbul ho gae bezar qaisar-bagh men
saath hai ik ghairat-e-gulzar qaisar-bagh men
bulbulon ko de rahe hain khaar qaisar-bagh men
baten bulbul ko suna shaida-e-rukh gul ko bana
kabk ko chal kar dikha raftar qiasar-bagh men
surat-e-idris jannat se nikalte hain kahin
ab to laaya tala-e-bedar qaisar-bagh men
shahid-e-gul motiyon men lad rahe hain aj-kal
abr-e-tar rahta hai gauhar-bar qaisar-bagh men
bulbulen gul se khafa hon qumriyan shamshad se
sair ho chaliye jo aap ai yaar qaisar-bagh men
kis tarah huron ko la kar khuld se dikhlaiye
kya bahar aai hai ab ke baar qaisar-bagh men
dekh paaen mere siine ke agar gul-ha-e-dagh
bulbulen hongi gale ka haar qaisar-bagh men
mausam-e-gul men yahin josh-e-junun ki hai bahar
rang la kar aenge sau baar qaisar-bagh men
ai sanam allah re jalva tira hairat-faza
but bane hain sahib-e-zunnar qaisar-bagh men
vo maraz khoe tabibon ki bhi ankhen khul gaiin
hai masiha nargis-e-bimar qaisar-bagh men
khuld men aa kar sharab-e-khuld se bhi ijtinab
jam-e-mai se zahida inkar qaisar-bagh men
qamat-e-bala ka rutba hai do-bala sarv se
turra hai sumbul pe zulf-e-yar qaisar-bagh men
daur men sultan-e-alam ki hain ye kaifiyyaten
ghairat-e-jam hai har ik mai-khvar qaisar-bagh men
dekh kar ru-e-musaffa yaar ka hairat hui
aaine hain pusht-bar-divar qiasar-bagh men
hai pae abr-e-bahari ye mahall-e-abru
aae zer-e-saya-e-divar qaisar-bagh men
dekh kar tere rukh-e-rangin ko ai rashk-e-bahar
gul hue hain baghban par baar qaisar-bagh men
jaiye vaqt-e-masihai hai ai ruh-e-ravan
muntazir hai nargis-e-bimar qiasar-bagh men
tujh se aur gul se hui bahs-e-jamal ai ghuncha-lab
mujh se bulbul se hui takrar qaisar-bagh men
nikhat-e-gul se ‘saba’ ham mast rahte hain mudam
bada-e-gul-gun nahin darkar qiasar-bagh men
Leave a Reply