Sameena Syed
udasi ḳhatm ho jaa.e agar tum milne aa jaao
mera har zaḳhm so jaa.e agar tum milne aa jaao
shab-e-hijran ke mathe par savere phir se raushan hon
ye rut gajre piro jaa.e agar tum milne aa jaao
tumhare qurb ke lamhe mayassar ham ko aa jaa.en
ye dil rangon men kho jaa.e agar tum milne aa jaao
sitara baḳht ka apna bulandi par nazar aa.e
zamin akash ho jaa.e agar tum milne aa jaao
havaon men basi phulon ki dil-avez ye ḳhushbu
mire dil men samo jaa.e agar tum milne aa jaao
kaḌakti dhuup hai sar par bhala inkar ye kab hai
mujhe savan bhigo jaa.e agar tum milne aa jaao
Leave a Reply