Kuchh to Rangini-E-Afkar Khule

Saifuddin Saif

kuchh to rangini-e-afkar khule

‘saif’ chal matla-e-anvar khule

barg-e-gul jaise hava ke ruḳh par

kis latafat se lab-e-yar khule

tu zara band-e-qaba khol to de

jauhar-e-nafa-e-tatar khule

dekh ai kucha-e-janan ki hava

dil ke darvaze ka.i baar khule

zaḳhm-e-dil ham ne chhupa.e varna

teri ankhon ne kiye vaar khule

vaah kya Dhang hain sayyadon ke

log phirte hain giraftar khule

kya isi tarah guzar ja.egi

kuchh to un par bhi dil-e-zar khule

hasrat-e-did pas-e-marg na puchh

rah ga.e dida-e-bedar khule

lab-e-ḳhamosh ko va kar zalim

ye hai iqrar ki inkar khule

saaf baḳhshe ga.e vo hashr ke din

jo nazar aa.e gunahgar khule

ka.abe ja kar bhi hamen kashf hua

but-kade men bhi kuchh asrar khule

ham bhi qismat ka likha dekhenge

‘saif’ chal nama-e-dildar khule