surat utar na jaa.e kahin mahtab ki
kah do ki baat jhuuT hai un ke shabab ki
sham-e-visal sej pe sharma.e juun dulhan
sharma.i yuun hain shaḳh pe kaliyan gulab ki
patthar uchhal dijiye yuun dil ki jhiil men
varna umiid rakhiye na mujh se javab ki
manzil qarib aa.i to bhaTka diya gaya
in rahbaron ne zindagi meri ḳharab ki
halat ne bigaḌ di ‘vahid’ ki shakl yuun
jaise ḳharab jild ho achchhi kitab ki
Leave a Reply