phir kabhi ḳhvab na aa.e vo suhane vaale
main samajhti thi ki phir a.enge jaane vaale
ghar se nikle to mila ajnabi chehron ka hujum
jhaḌ ga.e phuul bhi shaḳhon se purane vaale
ham hain TuuTi hui ik shaḳh-e-gul-e-zard magar
ham ko gul-dan men rakkhenge zamane vaale
ham koi chand sitare hain falak par chamken
ham vo aansu hain jo miTTi men samane vaale
tan ki miTTi bhi to hamrah nahin le ke ga.e
kaun si samt ko jaate hain ye jaane vaale
kaise darvaze hain dastak nahin hoti jin par
jin se ruḳhsat hue pardes basane vaale
ab ke barsat bhi barish ko taraste guzri
khul ke ro bhi na sake hansne hansane vaale
ab mire dil pe koi naqsh koi naam kahan
likhne vaale na rahe aur na miTane vaale
kitne hi log gharon ko nahin lauTe hain ‘sahar’
ham bhi ja.enge to vapas nahin aane vaale
Leave a Reply