Ameer Imam
aag ke saath main bahta hua paani sunna
rat-bhar apne anasir ki sunani sunna
dekhna roz andheron men shuaon ki numu
pattharon men kisi dariya ki ravani sunna
vo suna.engi kabhi meri kahani tum ko
tum havaon se kabhi meri kahani sunna
meri ḳhamoshi miri mashq hai is mashq men tum
maar kar tiir miri tishna-dahani sunna
umr na-kafi hai is hijrat-e-avval ke liye
phir janam luun to miri hijrat-e-sani sunna
kam-sini par hai ajab haal tumhara yaaro
sun lo asan nahin us ki javani sunna
giit mere jo pasand aate hain itne tum ko
inhin giton ki kabhi marsiya-ḳhvani sunna
kya naya tum ko suna.un ki naya kuchh bhi nahin
na.e lafzon men vahi baat purani sunna
Leave a Reply