gham nahin jo luT ga.e ham aa ke manzil ke qarib
jaane kitni kashtiyan Duubi hain sahil ke qarib
sarfaroshi meri koi rang dikhla ja.egi
aa gaya huun ye irada le ke qatil ke qarib
sirf dil ki be-hisi thi fasla kuchh bhi na tha
jab kiya ehsas paaya aap ko dil ke qarib
tum ne jo rakkha yuun hi taḳhrib-karana mizaj
kaun aane dega tum ko apni mahfil ke qarib
rukte hain kab rokne se mauj-e-tufan ke ‘guhar’
hausle vaale pahunch jaate hain sahil ke qarib
Leave a Reply