Sultan Akhtar
tanha.iyon ki barf thi bistar pe ja-ba-ja
sho.alon ka raqs raat badan par na ho saka
parchha.iyon ke ariz-o-lab kaun chumta
lazzat-farosh jism se main duur hi raha
main ne hi apne dil ke varaq par use likha
jo hadisa kisi se raqam ho nahin saka
har-samt khinch ga.e tiri yadon ke sa.eban
kal raat dard lauT gaya chiḳhta hua
yadon ne iztirab ki rekha.en khinch diin
varna mire sukun ka kaghaz safed tha
chehron se uḌ chuke hain shanasa.iyon ke aks
ab doston ki khoj men tu umr mat ganva
dil men sitam ka zahr labon par mai-e-ḳhulus
yaran-e-ḳhush-kalam ka ab tajraba hua
shayad use yaqin ki ungli na chhu sake
ik shaḳhs apne-ap se barson nahin mila
haa.il thi raste men rivayat ki ḳhalij
vo dil ki baat apni zaban tak na la saka
main chup raha to qaid ki mi.ad baḌh ga.i
chiḳha to aur halqa-e-zanjir kas gaya
paani ke intizar men phir ret phankiye
‘aḳhtar’ ye din bhi dhuup ki daldal men dhans gaya
Leave a Reply