vahi the jo apni justuju men khare nahin the
vagarna ham un ki dastaras se pare nahin the
tabhi vo samjhe ki ham khilaune nahin hain jab ham
vahan se un ko mile jahan par dhare nahin the
daraḳht phir se hara phalon se bhara hua hai
magar vo patte bahar men jo hare nahin the
us ek lamhe ka rang umron pe chha gaya hai
vo ek lamha ki rang jis men bhare nahin the
ajab sa ik ḳhvab dekh kar aankh khul ga.i hai
ham apne marne pe ro.e lekin mare nahin the
ḳhud apne hone ke ḳhauf men ab jo mubtala hain
ḳhuda ke hone se bhi vo pahle Dare nahin the
ye kaisi kaaya palaT hai shah maat de rahe hain
vo jin se shatranj ke piyade mare nahin the
hamen zamane ne kimiya-gar bana diya hai
janam se ham log yuun nahin the are nahin the
Leave a Reply