Mahesh Chandra Naqsh
pur-kaif baharon ne bhi dil toḌ diya hai
haan un ke nazaron ne bhi dil toḌ diya hai
tufan ka sheva to hai kashti ko Dubona
ḳhamosh kinaron ne bhi dil toḌ diya hai
is Dubte suraj se to ummid hi kya thi
hans hans ke sitaron ne bhi dil toḌ diya hai
kis tarah karen tujh se gila tere sitam ka
mad.hosh isharon ne bhi dil toḌ diya hai
maana ki thi ghamgin kali ḳhauf-e-ḳhizan se
chup rah ke baharon ne bhi dil toḌ diya hai
aghyar ka shikva nahin is ahd-e-havas men
ik umr ke yaron ne bhi dil toḌ diya hai
ye daur-e-mohabbat bhi ajab daur hai is men
ai ‘naqsh’ saharon ne bhi dil toḌ diya hai
Leave a Reply