hunar diyā bhī nahīñ le liyā añgūThā bhī
baḌe kamāl kī fankār hai ye duniyā bhī
hazār ālam-e-hairat karūñ nisār us par
nazar to aa.e koī chehra ā.īna sā bhī
maiñ apnī raah kī dīvār ḳhud banātā huuñ
mirā vajūd mujhe iiñT bhī hai gaarā bhī
bulā rahā huuñ sabhī ko ki mere saath aa.eñ
na aayā koī to maiñ chal paḌūñgā tanhā bhī
mirā zamīr mujhe ye yaqīñ dilātā hai
ki thā zavāl meñ thoḌā qusūr merā bhī
kisī kā saath koī umr bhar nahīñ detā
girāñ-bahā hai rifāqat kā ek lamha bhī