Munshi Naubat Rai Nazar Lakhnavi
khugar-e-lazzat huun main kis shokh ki taazir ka
dil ko hasrat hai ki pahlu dhundiye taqsir ka
tha mira hangama-e-vahshat azal se peshtar
arsh ki zanjir tukda hai miri zanjir ka
mar gaya zindan men jab main vahshi-e-atish-nafas
bujh gaya shoala charagh-e-khana-e-zanjir ka
sakht-jani se dil-e-muztar jo tadpa vaqt-e-qatl
ban gaya sang-e-fasan qatil tiri shamshir ka
ho ke bismil arzu-e-guftagu qatil se hai
har dahan-e-zakhm naqsha hai lab-e-taqrir ka
itni hai mashq-e-tasavvur intizar-e-qatl men
mardumak hai aankh men jauhar tiri shamshir ka
jaan kar thandi hava vo chain se sote to hain
dam bharun kyun-kar na ah-e-sard-e-be-tasir ka
hota hai insan paida vaste fariyad ke
ye ishara hai sarir-e-khama-e-tahrir ka
ruuh aa jaati hai tan men tegh-e-uryan dekh kar
murgh-e-jan bulbul hai bagh-e-jauhar-e-shamshir ka
aaj tak avaz aati hai dahan-e-gor se
hai ye madfan kushta-e-tegh-e-lab-e-taqrir ka
aur duuna gham uthaya ki mitane ki jo fikr
dagh-e-hasrat ho gaya likkha miri taqdir ka
rafta rafta yuun ghulaya qaid men gham ne ‘nazar’
tauq-e-gardan paanv men halqa bana zanjir ka
Leave a Reply