afzal-allahabadi

Apni Tanhaiyon Ke Ghaar Mein Hun

apni tanhaiyon ke ghaar men huun

aisa lagta hai main mazar men huun

tu ne puchha kabhi na haal mira

muddaton se tire dayar men huun

teri khushbu hai meri sanson men

jab se main teri rahguzar men huun

mujh pe apna hai ikhtiyar kahan

main to bas tere ikhtiyar men huun

mujh ko manzil se ashna kar de

main tiri raah ke ghubar men huun

jab se teri nigah-e-lutf uthi

chand taron ki main qatar men huun

mujh ko duniya se kya gharaz ‘afzal’

main to Duuba khayal-e-yar men huun

More Poems

Leave a Comment