Imam Azam
gard-o-ghubar dhuup ke anchal pe chha ga.e
aur ghan-garaj ke shor bhi badal pe chha ga.e
ab to koi kanval nahin khilta hai jhiil men
ab kanTe-dar barg hi jal-thal pe chha ga.e
vo so nahin sakega kisi pal sukun se
jab vasvase bhi ankhon ke kajal pe chha ga.e
bijli sitare chand shafaq aur dhuup chhanv
kaise zamin ke barhana jangal pe chha ga.e
‘azam’ ise vo kahte hain rangon ka ek fan
jab daagh dhabbe farsh ke maḳhmal pe chha ga.e
Leave a Reply