shakeel-badayuni

Dil Mein Kisi Khalish Ka Guzar Chahta Hun Main

dil men kisi khalish ka guzar chahta huun main

jaisi bhi ho bas ek nazar chahta huun main

kham ho ke phir na utthe vo sar chahta huun main

uth kar jo kham na ho vo nazar chahta huun main

hote hi tazkira koi aa jaae ru-ba-ru

itna buland zauq-e-nazar chahta huun main

mera sukun shauq hai sab kuchh mire liye

nalon ko be-niyaz asar chahta huun main

kya puchhte ho maqsad-e-izhar-e-arzu

sharh-e-vafa pe naqd-o-nazar chahta huun main

paiham gham-e-firaq se ghabra gaya hai dil

kuchh imtiyaz-e-sham-o-sahar chahta huun main

ji chahta hai aag laga duun naqab men

jalvon se intiqam-e-nazar chahta huun main

muhtaj-e-rahbar huun jahan khizr tak ‘shakil’

aisi bhi koi rahguzar chahta huun main

More Poems

Leave a Comment