dil-tang huun makan ke andar paḌa hua
bahar abad ka qufl hai dar par paḌa hua
mujh par garan guzarti hai meri sada ki guunj
chup huun durun-e-gumbad-e-be-dar paḌa hua
mumkin jo ho to ek nazar muḌ ke dekh le
ik naqsh hai zamin pe miT kar paḌa hua
main hi nahin huun din ke bagule ke saath saath
suraj ke paanv men bhi hai chakkar paḌa hua
khul hi ga.i hai aankh to avaz de ke dekh
ḳhamosh kyuun hai shab ka samundar paḌa hua
baiTha hua huun chhup ke hava ke hisar men
har-samt hai ghanim ka lashkar paḌa hua
mujh ko hava.en chalne se pahle sameT lo
main rahguzar men huun bikhar kar paḌa hua
jaise ho koi mere ta.aqub men rat-din
apne vajud ka hai mujhe Dar paḌa hua
main chhupta phir raha huun ḳhud apni hi zaat se
‘qaisar’ mira azaab hai mujh par paḌa hua
Leave a Reply