Urooj Zaidi Badayuni
ḳhvab ka aks kahan ḳhvab ki ta.abir men hai
mujh ko ma.alum hai jo kuchh miri taqdir men hai
meri rudad-e-mohabbat ko na sunne vaale
tujh men vo baat kahan jo tiri tasvir men hai
paikar-e-ḳhak bhi huun ba.is-e-kaunain bhi huun
kitna ijaz numayan miri tafsir men hai
phuul ban kar bhi ye ehsas shagufe ko nahin
meri taḳhrib ka pahlu miri ta.amir men hai
husn ke saath tujhe husn-e-vafa bhi milta
isi halqe ki zarurat tiri zanjir men hai
vus.at-e-daman-e-rahmat ki qasam khata huun
uzr-e-taqsir bhi daḳhil-e-had-e-taqsir men hai
ek tahdar ye misra.a hai javab-e-ḳhat men
kis qadar shoḳh-bayani tiri tahrir men hai
kya tamasha hai ye ai pa-e-junun-e-rusva
kabhi zanjir se bahar kabhi zanjir men hai
jaane kab us pe ujale ko taras aa.ega
vo siyah-posh faza jo miri taqdir men hai
guftugu hoti hai aksar shab-e-tanha.i men
ek ḳhamosh takallum tiri tasvir men hai
meri nazron men yahi husn-e-taghazzul hai ‘uruj’
sher-goi ka maza pairvi-e-‘mir’ men hai
Leave a Reply