na paaya khoj barson naqsh-e-pa-e-raftagan dhundhe
na ho mumkin pata jin ka unhen koi kahan dhundhe
talash is tarah bazm-e-aish men hai be-nishanon ki
koi kapde men jaise zakhm-e-sozan ka nishan dhundhe
ham us ke zikr hi se khush kiya karte hain dil apna
sahara jaise tinke ka ghariq-e-nim-jan dhundhe
kidhar ko ruuth kar jaata raha ahd-e-shabab apna
na paaya is musafir ko hazaron karvan dhundhe
uthana ho subuk aadam pe jab bar-e-amanat ka
kahan se phir koi is ke liye bar-e-giran dhundhe
girah sanson men daali hai ‘havas’ ifrat-e-girya ne
na ah-e-na-tavan aane ko lab tak nardban dhundhe