us ko ye zid hai ki rah jaa.e badan sar na rahe
ghumti jaa.e zamin aur koi mehvar na rahe
us ne himmat jo baḌha.i bhi to rakkha ye lihaz
koi buzdil na bane koi dilavar na rahe
us ne is tarah utari mire gham ki tasvir
rang mahfuz to rah jaa.en pa manzar na rahe
us ne kis naaz se baḳhshi hai mujhe ja-e-panah
yuun ki divar salamat ho magar ghar na rahe
ab ke andhi bhi chali jab to saliqe se chali
yuun ki rah jaa.e shajar shaḳh-e-samar-var na rahe
ab ye sazish hai ki likkhe na koi qissa-e-dil
lafz rah jaa.en magar koi suḳhan-var na rahe
Leave a Reply