ye jo rangin tabassum ki ada hai mujh men
mujh ko lagta hai koi mere siva hai mujh men
khud bhi hairan huun azal se ki ye kya hai mujh men
kaun shah-rag se miri bol raha hai mujh men
umar bhar jis ko tire gham ki amanat samjha
ab vahi tar-e-nafas tuut gaya hai mujh men
ek khushbu si ubharti hai nafas se mere
ho na ho aaj koi aan basa hai mujh men
mere qadmon pe zamane ki jabin jhuk jaae
devtaon ki tarah ek ana hai mujh men
tum to kun kah ke nigahon se chhupe ho lekin
har ghadi ek naya hashr bapa hai mujh men
kaun tha jo mire ehsas ko raushan karta
umr bhar sirf mira dil hi jala hai mujh men
dil kabhi zulmat-e-farda se hirasan na hua
ek khurshid naya roz uga hai mujh men
talkh-kami se to kuchh aur nikharti hai ‘hayat’
kis liye zahr koi ghol raha hai mujh men