Shakeel Gwaliari
zahr-e-gham ḳhuub piya ham ne sharabon se bache
jhel kar kitne azabon ko azabon se bache
sochne baiThen to soche hi chale jaate hain
ḳhauf kanTon ka ajab tha ki gulabon se bache
kitne ma.asum the chehre nahin dekhe tum ne
vo jo rah kar bhi naqabon men naqabon se bache
jagta ho to na dekhe koi mahlon ki taraf
kis tarah soya hua aadmi ḳhvabon se bache
is hikayat men koi jhuuT na kar de shamil
is men sachcha.i agar hai to kitabon se bache
kaash ulaT de koi sahra men samundar la kar
qafila Duub hi jaa.e to sarabon se bache
Leave a Reply