Sufi
ham hi badlenge rah-o-rasm-e-gulistan yaaro
ham se vabasta hai taamir-e-baharan yaaro
qurbat-e-kakul-o-rukhsar se ji tang nahin
ik zara chain to de gardish-e-dauran yaaro
laakh ham marhala-e-dar-o-rasan se guzre
zindagi se na hue phir bhi gurezan yaaro
ik thaka khvab ki siine men sulagta hai abhi
ik dabi yaad ki hai nish-e-rag-e-jan yaaro
amad-e-sub.h se mayus nahin hain lekin
das na le tirgi-e-sham-e-ghariban yaaro
aur kuchh duur ki thodi hai rah-e-jaur-o-sitam
aur kuchh der ki tuuta dar-e-zindan yaaro
apna dukh ho to ‘riyaz’ us ka mudava karte
hain sabhi shoala-ba-jan chak-e-gareban yaaro
Leave a Reply