ye rang tire shahr ke sahra men kahan hain
galiyan hain na kuche hain makin hain na makan hain
ankhon men chhupa rakkhe hain ashkon ke ḳhazine
ham gham ki inayat se mahrum kahan hain
jhalkenge kisi roz yahi lafz-o-bayan men
a.ina-e-ehsas men jo aks nihan hain
rakhte hain jo muḳhtari-e-insan ki tamanna
majburi-e-insan pe abhi ashk-fishan hain
ankhon men koi mauj-e-shafaq-rang nahin kyon
dil men to abhi ḳhuun ke dariya se ravan hain
taḳhliq-e-musavvir ko zara ghaur se dekho
rangon ke tanasub men ka.i rang nihan hain
kya kaam hamen mal-o-zar-o-sim se ‘shahid’
ham ahl-e-suḳhan ahl-e-qalam ahl-e-zaban hain
Leave a Reply