Jyoti Azad Khatri
meri kashti ko kinare pe lagate bhi nahin
apna kahte hai magar rishta nibhate bhi nahin
ik zamane se mujhe un se shikayat hai yahi
yaad karte bhi nahin mujh ko bhulate bhi nahin
zaḳhm phir tum ne kiye taaza vagarna ham to
dard ta-umr tumhen apna batate bhi nahin
jante hain ki tumhen farq na paḌna koi
apni palkon pe so ham ashk sajate bhi nahin
kuchh na badla hai na ummid badalne ki kuchh
jante hain tabhi to shor machate bhi nahin
is zamane ki yahi ek haqiqat hai ‘jyoti’
log rasman hi sahi dil se nibhate bhi nahin
Leave a Reply