Saud Usmani
har roz imtihan se guzara to main gaya
tera to kuchh nahin gaya maara to main gaya
jab tak main tere paas tha bas tere paas tha
tu ne mujhe zamin pe utara to main gaya
ye taaq ye charagh mire kaam ke nahin
aaya nahin nazar vo dobara to main gaya
shal ungliyon se thaam rakha hai chaTan ko
chhuTa jo haath se ye kinara to main gaya
apni ana ki ahani zanjir toḌ kar
dushman ne bhi madad ko pukara to main gaya
teri shikast asl men meri shikast hai
tu mujh se ek baar bhi haara to main gaya
Leave a Reply