Saleem Siddiqui
huun parsa tire pahlu men shab guzar ke bhi
main be-libas nahin pairahan utaar ke bhi
har ek sar ko bulandi ata nahin karte
usuul hote hain kuchh to salib-o-dar ke bhi
hamare aks bhi dhundhle hue to ham samjhe
ki a.inon se hain rishte yahan ghubar ke bhi
na ablon se hai raghbat na paanv se ranjish
ajab suluk hain maidan-e-ḳharzar ke bhi
vo be-yaqin bharosa na kar saka varna
the mere saath ka.i log e’tibar ke bhi
faqat tumhin ko nahin apni sadgi pe ghurur
dimagh arsh pe rahte hain ḳhaksar ke bhi
main jis ke paanv ki aahaT ka muntazir tha ‘salim’
vo ja chuka mujhe dahliz se pukar ke bhi
Leave a Reply