zo.am-e-hasti mire idrak se bandha gaya hai
aur badan turra-e-pechak se bandha gaya hai
ek aansu tiri poshak se bandha gaya hai
ya sitara koi aflak se bandha gaya hai
ishq ko gesu-e-pechak se bandha gaya hai
aur phir gardish-e-aflak se bandha gaya hai
ḳhaak uḌata huun main ta-umr nibhane ke liye
ek rishta jo mira ḳhaak se bandha gaya hai
TuuTe paḌte hain tamashe ko yahan par naḳhchir
aaj sayyad ko fitrak se bandha gaya hai
kisht-e-vahshat ho jise dekhni aa.e dekhe
har bagula ḳhas-o-ḳhashak se bandha gaya hai
phir vahi harf-e-tamanna hai vahi sa.at-e-dard
phir hamen dida-e-namnak se bandha gaya hai
ab kisi kuza-gari ki nahin hajat ki mujhe
ta fana ek isi chaak se bandha gaya hai
ham gunahgaron ki hai aḳhiri ummid vahi
ahd ik jo shah-e-laulak se bandha gaya hai
kuja ye shoḳh-ada duniya kuja main ‘irfan’
mard-e-sada zan-e-bebak se bandha gaya hai
Leave a Reply