Poet
ye ghazab baiThe-biTha.e tujh pe kya nazil hua
uTh chala duniya se kyuun tu tujh ko ai dil kya hua
shakl hi aisi bana.i hai tiri allah ne
mat ḳhafa ho gar hua main tujh pe maa.il kya hua
in dinon halat tiri paata huun main apni si yaar
ḳhub-ru tujh sa koi tere muqabil kya hua
ai but-e-ḳhun-ḳhvar ik zaḳhmi tire kuche men tha
so ka.i din se ḳhuda jaane vo ghayal kya hua
zang ho kar qais ka dil karvan-dar-karvan
nit ye kahta hai ki vo laila ka mahmil kya hua
fikr-e-marham mat karo yaaro ye batlao mujhe
jis ke hathon main hua zaḳhmi vo qatil kya hua
tha jigar to TukḌe TukḌe bar men kyuun taḌpe hai tu
kyuun dila tegh-e-jafa se tu bhi bismil kya hua
ranjishen aisi hazar aapas men hoti hain dila
vo agar tujh se ḳhafa hai tu hi ja mil kya hua
apne begane sabhi hain mat uTha mahfil se yaar
gar kisi Dhab se hua yaan main bhi daḳhil kya hua
dekhte hi teri surat mujh ko ai a.ina-ru
saḳht hairat hai ki pahlu men nahin dil kya hua
soch rah rah kar yahi aata hai ai ‘jur.at’ mujhe
ḳhalq karne se mire ḳhaliq ko hasil kya hua
Leave a Reply