Mujh Mein Soe Hue Mahtab Se Kam Waqif Hai

Nadiya Ambar Lodhi

mujh men soe hue mahtab se kam vaqif hai

tu miri aankh ke talab se kam vaqif hai

bughz-e-aada khu-e-ahbab se kam vaqif hai

jo mire halqa-e-arbab se kam vaqif hai

satvat-e-qasr-e-shahi dhoke men rakhta hai ki jo

azmat-e-gumbad-o-mehrab se kam vaqif hai

ishq ki chahiye taalim abhi aur use

jo mohabbat adab adab se kam vaqif hai

ziist karne ko bahut chashm-e-fusun-kar mujhe

vo mire ishq ke zartab se kam vaqif hai

maanavi taur par us pe main mukammal na khuli

vo miri zaat ke eraab se kam vaqif hai

tujh pe main kholungi ik din sabhi auraq-e-jamal

tu abhi husn ke abvab se kam vaqif hai

kya banega jo na tal paai bala-e-furqat

hijr to vasl ke asbab se kam vaqif hai

ek hi shakhs ka karti hai adab dhadkan bhi

dil to duniya tire adab se kam vaqif hai

itna poshida use rakkha hai ‘amabar’ sab se

aankh apni bhi mire khvab se kam vaqif hai