Husn Ko Dil Mein Chhupa Kar Dekho

husn ko dil men chhupa kar dekho

dhyan ki shama jala kar dekho

kya khabar koi dafina mil jaae

koi divar gira kar dekho

fakhta chup hai badi der se kyuun

sarv ki shakh hila kar dekho

kyuun chaman chhod diya khushbu ne

phuul ke paas to ja kar dekho

nahr kyuun so gai chalte chalte

koi patthar hi gira kar dekho

dil men betab hain kya kya manzar

kabhi is shahr men aa kar dekho

in andheron men kiran hai koi

shab-e-zud aankh utha kar dekho

Leave a Comment