na sirf tujh se mujhe intiqam lena hai
hisab-e-vahshat-e-umr-e-tamam lena hai
mire labon pe ye rakh di ga.i hai kis ki dua
ye saari umr mujhe kis ka naam lena hai
suna hai us ki nigahen adab-navaz hain so
kisi bhi tarah mujhe ik salam lena hai
main ik faqir-e-mohabbat huun mujh ko kya malum
ki kis suḳhan pe mujhe kitna daam lena hai
bas ek tu hi nahin hai mire nishane par
zamane bhar se mujhe intiqam lena hai
abhi to baaqi hain duniya ke ranj bhi aage
abhi to dil se mujhe aur kaam lena hai
Leave a Reply