Siddique Mujibi
dil-e-a.ina-saman paara paara kar ke dekha jaa.e
sitaron ko kabhi mahv-e-nazara kar ke dekha jaa.e
kabhi ta-der shabnam taḳht-e-gul par bhi nahin rahti
amir-e-shahr ko itna ishara kar ke dekha jaa.e
chamakta hai sar-e-mizhgan-e-nam jo TuuT kar dil se
chalo us ashk-e-ḳhuni ko sitara kar ke dekha jaa.e
hari kanTon-bhari belen miri sanson se lipTi hain
aziyyat hi sahi kuchh din guzara kar ke dekha jaa.e
kahan fursat farishton si ki ham ye dard-e-sar molen
hisab-e-dostan ko goshvara kar ke dekha jaa.e
hamen dil jitne ka fan to aata hai magar socha
kabhi aisa bhi ho apna ḳhasara kar ke dekha jaa.e
na jaane kitne aalam hain ‘mujibi’ ek aalam men
agar duniya ko duniya se kinara kar ke dekha jaa.e
Leave a Reply