Zamana Lakh Samajhta Ho Ahmiyat Meri

zamāna laakh samajhtā ho ahmiyat merī

mirī nazar meñ nahīñ koī haisiyat merī

koī to thā jo mirī zindagī se guzrā thā

batā rahī haiñ zamāne ko kaifiyat merī

maiñ saarī duniyā ko apnā hī ghar samajhne lagūñ

na koī shahr ho merā na shahriyat merī

navāzishoñ ne zamāne kī mujh ko chauñkāyā

mujhe kahāñ thī patā koī ḳhāsiyat merī

ye sher-o-shā.erī merī ye mere chand ḳhayāl

yahī asāsa mirā ye hī milkiyat merī

chhupā ke dard jo kartī rahī adākārī

samajh meñ aa ga.ī ab tum ko asliyat merī

maiñ in dukhoñ kā gila kis liye karūñ ai ‘siyā’

inhī dukhoñ ne nikhārī hai shaḳhsiyat merī

Leave a Comment