Siya Sachdev
zamana laakh samajhta ho ahmiyat meri
miri nazar men nahin koi haisiyat meri
koi to tha jo miri zindagi se guzra tha
bata rahi hain zamane ko kaifiyat meri
main saari duniya ko apna hi ghar samajhne lagun
na koi shahr ho mera na shahriyat meri
navazishon ne zamane ki mujh ko chaunkaya
mujhe kahan thi pata koi ḳhasiyat meri
ye sher-o-sha.eri meri ye mere chand ḳhayal
yahi asasa mira ye hi milkiyat meri
chhupa ke dard jo karti rahi adakari
samajh men aa ga.i ab tum ko asliyat meri
main in dukhon ka gila kis liye karun ai ‘siya’
inhi dukhon ne nikhari hai shaḳhsiyat meri
Leave a Reply