Dil Salamat Agar Apna Hai To Dildar Bahut

dil salamat agar apna hai to dildar bahut

hai ye vo jins ki jis ke hain kharidar bahut

ek main hi tire kuche men nahin huun betab

sar patakte hain khabar le pas-e-divar bahut

dekhiye kis ke lage haath tira gauhar-e-vasl

is tamanna men to phirte hain talabgar bahut

kahin nargis ko magar tu ne dikhain ankhen

nahin bachte nazar aate hain ye bimar bahut

kya karun kis se kahun haal kidhar ko jaun

tang aaya huun tire haath se dildar bahut

apne ashiq se kiya puchho to kaise ye suluk

aur bhi shahr men hain tujh se trahdar bahut

tire aate to koi phuul na hoga sarsabz

kya hua baagh men go phule the gulzar bahut

ek din tujh ko dikhaunga main in khuban ko

dava-e-yusufi karte to hain izhar bahut

jurm-e-bosa pe jo ‘bedar’ ko maara maara

na karo jaane do is baat pe takrar bahut

Leave a Comment