dil-lagi aur chiiz hoti hai
dilbari aur chiiz hoti hai
rasm hai yuun muanqa karna
dosti aur chiiz hoti hai
ba-vazu huun main qibla-ru bhi magar
bandagi aur chiiz hoti hai
in ujalon ko raushni na kaho
raushni aur chiiz hoti hai
ham to lashen hain saans leti hui
zindagi aur chiiz hoti hai
harf-dar-harf dard hain baaba
sha.iri aur chiiz hoti hai
bandishen aur chiiz hain ‘tariq’
sha.iri aur chiiz hoti hai
Leave a Reply