Zeb Ghauri
ujḌi hui basti ki sub.h o shaam hi kya
ḳhaak uḌane valon ka anjam hi kya
paas se ho kar yunhi guzar jaati hai saba
divane ke naam koi paigham hi kya
jo bhi tumhare ji men aa.e kah Daalo
ham mastane log hamara naam hi kya
daur-e-mai-o-saghar bhi apne shabab pe hai
gardish men hai charḳh-e-nili-fam hi kya
‘zeb’ ke mar jaane ki to ye umr na thi
Duub gaya suraj bala-e-bam hi kya
Leave a Reply