Main Kahan Tak Tujhe Safai Dun

maiñ kahāñ tak tujhe safā.ī duuñ

ḳhud ko ilzām-e-bevafā.ī duuñ

tujh se maiñ dushmanī shadīd karūñ

pyaar bhī tujh ko intihā.ī duuñ

a mirī jaan gar ijāzat ho

zaḳhm ko izn-e-lab-kushā.ī duuñ

zindagī tujh ko e’tibār nahīñ

apne hone kī maiñ gavāhī duuñ

mujh ko ḳhud mere paas le aanā

maiñ tujhe gar kahīñ dikhā.ī duuñ

ik zamāna hai gosh-bar-āvāz

ik zamāne ko maiñ sunā.ī duuñ

vā karūñ tujh pe manzil-e-idrāk

phir tujhe zauq-e-nā-rasā.ī duuñ

Leave a Comment