Ejaz Gul
galiyon men bhaTakna rah-e-alam men rahna
yaan sab ko hai nakami-e-yak-gam men rahna
pahle to bikhar jaana guzargahon ke hamrah
phir hasrat-e-divar-o-dar-o-bam men rahna
baghat men phirna ḳhas-o-ḳhashak pahan kar
har silsila-e-sabz ke anjam men rahna
har saans men ghulna tiri dahliz ki ḳhushbu
har aankh ka duuri ke siyah daam men rahna
avaz na aana kisi abad makan se
har haath ka yaan dastak-e-nakam men rahna
kuchh der men khul ja.ega basti ka nasiba
kuchh der hai aur saḳhti-ayyam men rahna
‘ejaz’ bahut din se hai shohrat ka bulava
tum ho ki vahi qarya-e-gumnam men rahna
Leave a Reply