Tariq Naeem
ajiib dard ka rishta tha sab ke sab ro.e
shajar gira to parinde tamam shab ro.e
kisi ka bhi na charaghon ki samt dhyan gaya
shab-e-nashat vo kab kab bujhe the kab ro.e
hazar girya ke pahlu nikalne vaale hain
use kaho ki vo yunhi na be-sabab ro.e
hamare zad-e-safar men bhi dard rakkha gaya
so ham bhi TuuT ke ro.e safar men jab ro.e
kisi ki aankh hi bhigi na sail-e-dard gaya
tumhari yaad men ab ke baras ajab ro.e
tire ḳhayal ki lau hi safar men kaam aa.i
mire charagh to lagta tha ro.e ab ro.e
kuchh apna dard hi ‘tariq’-na.im aisa tha
baghair mausam-e-girya bhi ham ghazab ro.e
Leave a Reply