Arsh Malsiyani
kya chara karen kya sabr karen jab chain hamen din-rat nahin
ye apne bas ka rog nahin ye apne bas ki baat nahin
jo us ne kiya achchha hi kiya jo ham pe hua achchha hi hua
ab girya-o-gham kuchh chiiz nahin ab nala-e-gham kuchh baat nahin
ham sabr-o-raza ke bande hain jo tum ne kiya sab jhel liya
ab dil men bhi afsos nahin ab lab par bhi haihat nahin
jab ulfat ka dam bhar baiThe jab chaal hi ulTi chal baiThe
nadan ho phir kyuun kahte ho is chaal men baazi maat nahin
kuchh ranj nahin kuchh fikr nahin duniya se alag ho baiThe hain
dil chain se hai aram se hai alam nahin afat nahin
tum lutf ko jaur batate ho tum nahaq shor machate ho
tum jhuTi baat banate ho ai ‘arsh’ ye achchhi baat nahin
Leave a Reply