vahi mohtaram rahe shahr men jo tafavuton men lage rahe
jinhen pas-e-izzat-e-harf tha vo riyazaton men lage rahe
unhen tum darazi-e-umar ki nahin, hausle ki dua.en do
vo jo ek nisbat-e-be-aman ki hifazaton men lage rahe
mire haath men tire naam ki vo lakir miTti chali ga.i
mire chara-gar mire dard ki hi vazahaton men lage rahe
unhen be-yaqini-e-sub.h ki main dalil duun bhi to kis tarah
vo jo ibtida men hi intiha ki zamanaton men lage rahe
tiri hairaten tiri aankh men hi tamam umr paḌi rahin
tiri sha.eri ke sabhi hunar to shikayaton men lage rahe
Leave a Reply