pahli pahli vo mulaqat vo barsat ki raat
yaad hai yaad hai vo sharm-o-hijabat ki raat
vo lagavaT se hama shikve-shikayat ki raat
vo tire saya-e-gesu men hikayat ki raat
Dol par chand hare khet faza.en ḳhamosh
kaisi ma.asum hava karti hai dehat ki raat
hashr ka roz kabhi ḳhatm to hoga zahid
aa.egi aa.egi zalim ye ḳharabat ki raat
ek jannat ke liye itna alam shaiḳh-e-haram
kaash hoti tiri qismat men ḳharabat ki raat
inqalab aisa bhi mumkin hai palaT de taqdir
dusri baar miri pahli mulaqat ki raat
ruuh paband-e-anasir hai bas itni ‘talib’
jaise mehman musafir ho koi raat ki raat
Leave a Reply