Raees Niyazi
dil-o-nigah pe jis ko ho iḳhtiyar chale
rah-e-vafa men koi bhi na ḳham-kar chale
hamen ravish pe zamane ki e’tibar nahin
hamare saath zamana hazar baar chale
ham apne vaqt ke aaqa ham apne daur ke shaah
magar ḳhuda na kare apni pesh-e-yar chale
ye rahravan-e-mohabbat hi ḳhuub jante hain
ki farsh-e-gul pe chale ya ba-nok-e-ḳhar chale
na rahbar pe nazar aur na manzilon ki ḳhabar
tire qadam-ba-qadam tere jan-nisar chale
hamare ba.ad ke logon pe jaane kya guzre
‘ra.is’ ham to baḌe chain se guzar chale
Leave a Reply