hasb-e-ma.amul aa.e hain shaḳhon men phuul ab ke baras
saya-afgan hain magar un par babul ab ke baras
is tarah badla mohabbat ka usuul ab ke baras
ham bhi hain maghmum tum bhi ho malul ab ke baras
jhonpaḌon se kaT ke chandi ke bagule chal diye
baala baala uḌ ga.i sone ki dhuul ab ke baras
itne gham itne masa.il itne unvan-e-soḳhan
hai juda har sher ki shan-e-nuzul ab ke baras
kaT ga.iin sadiyan isi mauhum si ummid par
asman se hoga rahmat ka nuzul ab ke baras
miT ga.i tahrir-e-qismat uTh ga.e anjum-shanas
aql ḳhud karti hai tadbir-e-husul ab ke baras
inqilab-asar hai raftar mah-o-sal ki
kuchh to badlega zamane ka usuul ab ke baras
Leave a Reply