Bahut Mushkil Sahi Lekin Ba-Sad Mushkil Bhi Dekhenge

Qaisar Haideri Dehlvi

bahut mushkil sahi lekin ba-sad mushkil bhi dekhenge

ki anvar-e-haqiqat taliban-e-dil bhi dekhenge

ḳhuda taufiq de ham ko to dil ko dil bhi dekhenge

inhin ankhon se ham asan har mushkil bhi dekhenge

na kamil zauq-e-nazara na shauq-e-jada-paima.i

agar kamil talab hai to mazaq-e-dil bhi dekhenge

vo kashti aaj jo Takra rahi hai mauj-e-tufan se

usi kashti ko ham ik din sar-e-sahil bhi dekhenge

dar-e-haidar pe ‘qaisar’ sar jhuka kisra ka qaisar ka

gada-e-ku-e-haidar husn-e-mustaqbil bhi dekhenge