akhtar-ul-iman

Faisla

aaj socha hai ki ehsas ko zaail kar duun

apne shorida irade ko apahij kar luun

apni majruh tamanna ka mudava na karun

apni khvabida mohabbat ka alamnak maaal

apni be-khvab javani ko sunaya na karun

apne be-kaif tasavvur ke sahare ke liye

ek bhi shama sar-e-rah jalaya na karun

apne be-sud takhayyul ko bhatak jaane duun

zindagi jaise guzarti hai guzar jaane duun

chand lamhon men guzarne ko hai hangama-e-shab

so gae jaam surahi ka sahara le kar

sard padne laga ujdi hui mahfil ka gudaz

thak gai gardish-e-yak-rang se saaqi ki nazar

chand bedar fasanon ka asar luut gaya

dab gaya talkh haqiqat men nasha ta-ba-kamar

main abhi akhiri mai-nosh huun maikhane men

dekhna kya hai miri samt badha jaam badha

la surahi ko mire paas shikasta hi sahi

chhed tuute hue taron ko karahen to zara

sochta kya hai undel aur undel aur undel

sard padti hui mahfil ke mukaddar pe na ja

apne bedar tafakkur ki halakat pe hansun

aaj socha hai ki ehsas ko zaail kar duun

More Poems

Leave a Comment