Farah Iqbal
muddaton ham se mulaqat nahin karte hain
ab to saae bhi koi baat nahin karte hain
dasht-e-hairan ka pata aaj bhi maalum nahin
ab to rahon men bhi ham raat nahin karte hain
mabadon men jo jalate the diye mere liye
ab sar-e-sham munajat nahin karte hain
baant dete hain sabhi khvab suhane apne
daman-e-dard se khairat nahin karte hain
rok lete the jo jangal men vo aaseb bhi ab
chup hi rahte hain savalat nahin karte hain
vo jo barse the inayat ke badal ham par
vo bhi ab pahli si barsat nahin karte hain
kitne barham the ‘farah’ tuut ke jab bikhre the
aj-kal ham bhi shikayat nahin karte hain
Leave a Reply