ahmad-ali-barqi-azmi

Tha Jo Mere Zauq Ka Saman Aadha Rah Gaya

tha jo mere zauq ka saman aadha rah gaya

bahr-e-dil men ishq ka tufan aadha rah gaya

main idhar bechain huun aur vo udhar hai muztarib

dastan-e-ishq ka unvan aadha rah gaya

chand lamhe baad hi aa kar vo rukhsat ho gaya

us se milne ka tha jo arman aadha rah gaya

us ki tasvir-e-tasavvur hai nazar ke samne

khana-e-dil men jo tha mehman aadha rah gaya

tishna-e-takmil hai mere savalon ka javab

main samajhta tha jise asan aadha rah gaya

ibn-e-adam ki kabhi puuri nahin hoti havas

vo samajhta hai abhi saman aadha rah gaya

ilm zahir aur batin lazim-o-malzum hain

jo na samjhe us ko vo insan aadha rah gaya

apni apni sarhadon se hain sabhi na-mutmain

chiin aadha rah gaya japan aadha rah gaya

sab ki Dafli hai alag aur sab ka apna raag hai

shaikh aadha rah gaya aur khaan aadha rah gaya

naqidon ke darmiyan hai in dinon mauzu-e-bahs

‘mir’ aur ‘ghalib’ ka jo divan aadha rah gaya

sher likh sakta nahin jo kar raha hai is ki sharh

sher-fahmi ka tha jo ruj.han aadha rah gaya

kah raha hai jis ki nazron men barabar hain sabhi

is amir-e-shahr ka farman aadha rah gaya

hai kabhi niime darun vo aur kabhi niime barun

aadmi ka aj-kal iman aadha rah gaya

ik jhalak dikhla ke apni jo kabhi lauta nahin

us ke ‘barqi’ hijr men be-jan aadha rah gaya

More Poems

Leave a Comment