tazad-e-jazbat men ye nazuk maqam aaya to kya karoge
main ro raha huun tum hans rahe ho main muskuraya to kya karoge
mujhe to is darja vaqt-e-ruḳhsat sukun ki talqin kar rahe ho
magar kuchh apne liye bhi socha main yaad aaya to kya karoge
abhi to tanqid ho rahi hai mire mazaq-e-junun pe lekin
tumhari zulfon ki barhami ka saval aaya to kya karoge
tumhare jalvon ki raushni men nazar ki hairaniyan musallam
magar kisi ne nazar ke badle jo dil azmaya to kya karoge
utar to sakte ho yaar lekin ma.aal par bhi nigah kar lo
ḳhuda-na-karda sukun-e-sahil na raas aaya to kya karoge
kuchh apne dil par bhi zaḳhm khaao mire lahu ki bahar kab tak
mujhe sahara banane vaalo main laḌkhaḌaya to kya karoge
abhi to daman chhuḌa rahe ho bigaḌ ke ‘qabil’ se ja rahe ho
magar kabhi dil ki dhaḌkanon men sharik paaya to kya karoge
Leave a Reply