Rizwan Haider
inhin ulma ke hathon diin ko dinar hona hai
vo din nazdik hai jis din inhen finnar hona hai
bahut ḳhush ho rahe ho kar ke bai’at ka taqaza tum
abhi tum jante kya ho abhi inkar hona hai
ye kis ghaflat men ho ai dosto bedar ho jaao
kisi mard-e-mujahid ke liye tayyar hona hai
abhi se tum pareshan ho abhi dekha hi kya tum ne
kisi din to tumhi ko qafila-salar hona hai
safar mushkil hai har ik faisle par ghaur karna tum
kahan par mom hona hai kahan talvar hona hai
tumhari mushkilen asan hongi jab vo a.enge
abhi majbur ho lekin tumhen muḳhtar hona hai
naqab-e-ruḳh abhi ik shaḳhs ka uThne ko baaqi hai
vo jab parda haTa.enge tumhen didar hona hai
bahut jaldi uḌa denge yazid-e-vaqt ki ninden
abhi zanjir pahni hai abhi jhankar hona hai
hamari raah men bikhre hain jo har samt angare
are ‘rizvan’ isi atish ko to gulzar hona hai
Leave a Reply